LAOAG CITY – Naipilan babaen iti inquest ti kaso a direct assault upon an agent of person in authority penalty ken serious disobedience kontra iti maysa nga opisyal ti Philippine National Police (PNP) a nakabase iti Camp Crame ngem natiliw iti ili ti Piddig.
Daytoy ti inpakaammo ni POlice Major Jephre Taccad, ti pannakangiwat ti Ilocos Norte Police Provincial Office (INPPO).
Binigbig ni Taccad ti natiliw nga opisyal ti PNP a ni Police Capt. Ramil Razon y Quesada, taga ili ti Piddig ngem nakabase iti Camp Crame.
Innayon na a nakikoordinar da payen iti Investigation section para iti pannakaipila ti kaso administratibo kontra iti nasao nga opisyal ti nailian a pulisya.
Kuna pay ni Taccad a no maipursige ti kaso administratibo ket sumango ti opisyal ti grave misconduct ken no sadinno a mabalin a maikkat iti serbisyo.
Immun-una iti daytoy, adda ti naawat a tawag ti PNP-Piddig nga adda ti maysa a pamilya nga agririri iti minatayan iti Barangay Loing iti nasao nga ili gapo iti sanikua.
Gapo iti daytoy, dagus da a nagresponde iti nasao a lugar ken ditoy a nagpabigbig ti pulis a maysa a Police Captain a naka-assign iti Camp Crame.
Inbatad ni Police Lt. Tolentino Erum, ti chief of police ti PNP-Piddig a kas panagrespeto iti opisyal ket nakisarita a nasayaat dagiti nagresponde a kakadwa da nga agsardengen daytoy tapno saan a dumakkel ti riri ngem saan a nagsardeng.
Kunana a gapo iti daytoy ket nagdesisyon dagiti kameng ti PNP-Piddig a tiliwen ti nadakamat nga opisyal ti PNP no sadinno ket nabartek daytoy iti dayta a gundaway.
Inlawlawag na a bayat nga adda da iti uneg ti patrol car ket naggulagol ti opisyal a rason ti nakasugatan ti muging na.
Malaksid iti daytoy, kinumpimaran ni Erum nga adda ti maysa a kameng ti PNP-Piddig ti nadangran kalpasan a kinugtaran ti opisyal.
