LAOAG CITY – Nasolbaren ti kaso mainaig iti panagdinnungpar ti maysa a tricycle ken service vehicle ti Land Transportation Office (LTO) ditoy ciudad ti Laoag.
Daytoy ti inbatad ni Police Corporal Alex Rosal, imbestigador iti PNP Traffic Division ditoy ciudad.
Nabigbig ti driver ti lugan ti LTO a ni Ronald Padalla y Segyep, agtawen ti 45, naasawaan, Lto enforcer ken residente iti Candon City ken ti driver ti tricycle ket ni Victor Villanueva y Mercado, agtawen ti 59 tricycle driver ken residente iti Brgy. 4 Bacarra.
Segun ken ni Rosal, ibaklay amin ni pagpaagas ti tricycle driver a ni Villanueva ken patarimaan na ti perdisyon ti lugan na.
Immuna iti daytoy, iti imbestigasyon ti PNP Traffic Division, bayat a daldalyasaten ti lugan ti LTO ti secondary road a Mabini st. ket dita a nakadinnungpar na ti tricycle nga adda met iti Balintawak St a maibilang a primary road.
Gapu iti daytoy, nakuppit ti kannawan a paset ti lugan ti LTO ken naitaray ni Villanueva iti Gov Roque Ablan Sr. Memorial Hospital gapu ta nasakit ti barukong na.
