LAOAG CITY – Agtultuloy pay laeng ti imbestigasyon dagiti kameng ti PNP-Badoc iti napasamak a pammaltog iti paset ti Barangay Pasuc iti nasao nga ili.
Nabigbig ti biktima a ni Jay Glenn Dagupion, agtawen ti 35, barangay tanod ken residente iti Sitio Patarong, Barangay Saud iti nasao nga ili.
Segun kenni Police Corporal Bryan Mancian iti PNP-Badoc, awan pay dagiti maitudo a suspek ken awan pay ti makitkita da a motibo iti nasao nga insidente.
Maipalagip a ni Dagupion ket agturong kuma iti ili ti Pinili kadwa na ti asawa ken anak na idi pinaltu-paltugan dagiti saan pay a nabigbig a suspek iti naminpat a daras ngem nagasat gapu ta saan a natamaan.
Nakarekobre dagiti otoridad ti uppat nga empty shells ti kalibre 45 a paltog iti nakapasamakan ti pammaltog.
Rumrumwar pay iti imbestigasyon nga adda ti nakikapkappengan a grupo ti biktima ken nakairamramanan na a kaso.
