LAOAG CITY – Inlawlawag ni Sangguniang Panlungsod Member Jason Perera a saan pay laeng a mabalin a maipila ti kaso administratibo kontra ken ni Barangay Chairman Rod Norman Martin ti Brgy. 33-B, Lapaz ditoy siudad ti Laoag.
Segun kenkuana, awan pay ti naawatna a verified complaint kas Chairman ti Committee on Laws nga isu ti posible a pangibasaranda iti pannakatratar ti nasao a kaso.
Inbatadna a saan a mabalin a motu proprio wenno babaen laeng iti Sangguniang Panlungsod ti paggapoan ti reklamo no di ket dagiti met laeng maseknan iti pasamak.
Mainaig iti daytoy, naammoan nga addan ti verified complaint ngem saan laeng a nakaipaay ti kopya ti Sangguniang Panlungsod Secretariat kadagiti agpanpanday linteg iti konseho nangruna ken ni Konsehal Perera nga isu ti maseknan a Chairman ti nasao a komite.
Maipalagip nga itay napan a lawas ket nagturong dagiti maseknan a menor de edad kaduada dagiti nagannak kadakuada iti Sangguniang Panlungsod kalpasan ti panangiberipikarda ti reklamoda iti piskalya ken kinasaritada ni Vice Mayor Rey Carlos Fariñas maipanggep iti planoda a mangipila ti kaso kontra ken ni Kapitan Martin.
Immuna iti daytoy, nagsagaba ti sugat iti nagduduma a paset ti bagi dagiti nadakamat a menor de edad kalpasan ti maipagarup a panangdangran kadakuada ni Kapitan Martin.
