LAOAG CITY – Inbatad ni Agent Rodrigo Ramirez iti Philippine Drug Enforcement Agency (PDEA) a nabayagen a monmonitoren da ti subject ti buy-bust operation iti Barangya Madamba iti ili ti Dingras.
Inbaga na a ti subject iti operasyon a ni Aaron Estras y Malbog, agtawen ti 35, construction worker ket taga Pangasinan ngem agdama agnanaed iti nadakamat a barangay.
Inlawlawag na nga adda ti naawat da nga impormasyon mainaig iti maipagarop nga illegal nga aktibidad ni Estras ken iti panagvalidate da ket napaneknekan da a positibo nga aglaklako ken agus-usar ti illegal a droga ti suspek.
Kuna na pay a saan da a dagus a nakaisayangkat ti operasyon gapu ta narigat da a matiyambaan ti suspek.
Nupay kasta, apaman a naikkan da ti gundaway idi kalman ket insigida da a nangiyuswat ti operasyon a nakatiliwan da iti suspek.
Iti pannakatiliw ti suspek ket ditoy a nakumpiskar da ti nausar iti operasyon a maysa nga heat sealed sachet a naglaon ti maatap a shabu, karaman ti 4,000 a pisos a boodle money, ken 1,000 genuine money.
Inpakaammo pay ni Ramirez a malaksid iti ili ti Dingras ket agop-operar pay ni Estras kadagiti kaparanget na nga ili.
