LAOAG CITY – Nagballag ni United States President Donald Trump iti Iran kabayatan a kumarkaro ti tension mainaig iti panaglukat iti Strait of Hormuz.
Iti maysa a post iti Truth Social, inbatad ni Trump a posible maaddaan ti nalawa a didigra no saan a matungpal ti temporario a katulagan.
Kunana a mangnamnama daytoy a ti posible a panagbalbaliw iti panangidaulo ti Iran ket mabalin nga agresulta ti positibo a resulta.
Nangipaay ni Trump ti ultimatum iti gobiernot ti Iran agingga iti alas-8 ti rabii tapno umannugot iti maysa a ceasefire a pakairamanan ti panaglukat manen ti Strait of Hormuz.
Idi Marso 21, immunan a nagpangta ni Trump a dadaelen dagiti power plant ti Iran no saan a lukatan ti nasao a pagdalyasatan iti uneg ti 48 nga oras.
Nupay kasta, kalpasan ti dua nga aldaw, inlawlawagna a nagbalin a “produktibo” ti panagsinnarita ti dua a pagilian isut gapuna a temporario nga intantanna ti plano a panangatake iti lima nga aldaw.
Idi Marso 27, naminsanna manen nga intantan ti plano iti uneg ti 10 nga aldaw gapu iti maipagarup a kiddaw ti gobierno ti Iran a nangikeddeng ti baro a deadline idi Abril 6.
Kabayatan nga umas-asideg ti petsa, nagballaag manen ni Trump idi Biernes nga adda ti 48 nga oras laengen ti Iran sakbay nga iparuk-atna ti “all hell.”
Iti maysa pay a post idi Domingo, nagpangta ni Trump ken dinakamatna a ti aldaw ti Martes kas “Power Plant Day” ken “Bridge Day,” a mapasamak iti oras ti alas-8 ti rabii.
Ti Strait of Hormuz ket maysa kadagiti kapapatgan a ruta ti langis iti intero a lubong isu nga aniaman a panagserra wenno riribok ditoy ket mabalin a mangitunda ti epekto iti world economy ken seguridad.
Iti agdama, awan pay ti opisial a sungbat ti Iran iti baro nga ultimatum ti Amerika.
