LAOAG CITY – Kinarit ti maysa a kongresista ni Vice President Sara Duterte a bumaban iti puesto kas sekretario ti Department of Education.
Inaramid ni Manila 3rd District Rep. Joel Chua ti rakurak kagiddan ti panangibaga ni First Lady Liza Araneta Marcos a ‘bad shot” ni Sara para ken ni First Lady Marcos kalpasan nga inpalgak ti amana a ni dati a Presidente Rodrigo Duterte a bangag ni Presidente Ferdinand Marcos Jr.
Malaksid iti daytoy, nagatendar pay ti prayer rally dagiti supporters ni Digong ni Sara no sadino nagtennag daytoy iti ‘political agenda’ iti pammabalaw iti administrasion Marcos kadagiti miembro ti pamilia Duterte.
Inbatad ni Chua, agul-ulimek ni Sara bayat ti pamiliana ket banbanatanda ni Presidente Marcos Jr. ken awan ti inaramidna tapno ilaban ti Pilipinas kontra kadagiti agresibo nga addang ti China kontra kadagiti Pilipino iti West Philippine Sea.
Inlawlawag ni Chua a bayat nga awan ti ar-aramiden ni Duterte kontra kadagiti panangbabalaw ti pamiliana iti Presidente ket agtultuloy a mairaman kas paset ti opisial ti pamilia ti Presidente.
Kunana a masaysayang laeng ti oras iti pannakaisayangkat ti Catch-up Fridays ti Department of Education schools gapu ta awan met ti resulta daytoy.
