LAOAG CITY – Nagballaag ni Vice President Sara Duterte iti publiko kontra kadagiti agpampammarang nga isuna iti messaging platform.
Iti advisory a naiparuk-at babaen ti social media account-na ken iti Office of the Vice President, ginutigot ti Bise Presidente iti publiko nga agannad kadagiti mapagduduwan a mensahe manipud kadagiti tattao nga agpampammarang nga isuna.
Kagiddan iti ballaag ket ti screenshot ti maysa a saritaan no sadinno a ti agpampammarang a ni Duterte ket dumawdawat ti listaan dagiti kongresista a maipagarop a mangsupsuporta iti Bise Presidente.
Inbalakad ni Duterte a saan a makikoordinar, mangipaay ti personal nga impormasyon, ken ad-adda pay a saan a mangipatulod ti kwarta,gapu ta kaanuman ket saan nga agkidkiddaw ti aniaman a pabor, pinansyal man wenno saan iti publiko
Innayon ni Duterte nga agridam ti publiko kontra kadagiti manangallilaw nga indibidual aglalo iti baet ti agdama a krisis.
