LAOAG CITY – Napadayawan dagiti sangapulo a police officers manipud iti Ilocos Norte Police Provincial Office iti Session Hall ti Sangguniang Panlalawigan.
Indauloan da Gob. Matthew Marcos Manotoc ken ni Provincial Director P/Col. Frederick Obar pakairamananda Bise Gob. Cecilia Araneta Marcos ken ni Sangguniang Panlalawigan Member Saul Lazo ti pannakaisayangkat ti nasao nga aktibidad.
Binigbig ti Gobernador dagiti naipaayan ti pammadayaw a da Pol. Maj. Jephre Taccad iti Police Community Affairs; Pol. Maj. Jeffrey Juan iti Administrative and Support Services; Pol. Maj. Eduardo Santos iti Anti-illegal drugs operations; Pol. Maj. Fernando Fernandez Jr. iti Anti Terrorism ken Anti Insurgency; Police Capt. Cristopher Pola iti Intelligence and Special Operations; Police Capt. Alice Vicente ti Operations Plans and Strategy; Pol. Capt. Jenine Lingan ti Women and Children Protection;Pol. Capt. Johnjohn Garan ti Police Safety Traffic; Pol. Msgt. Jefferson Ulep ti Information and Communications Technology ken ni Patrolman Karl Jeric Buenavista ti Investigation and Detective Management.
Ibilang ti Gobernador dagitoy a “Most Outstanding” kadagupan dagiti amin a kameng ti Ilocos Norte Police Provincial Office a para kenkuana ket agpapada nga outstanding iti napintas a serbisio nga ipapaayda ditoy probinsia.
Inbatadna a nagaget amin dagitoy a kas kadagiti doktor a sindadaan nga agserbi no masapul ti serbisioda kadagiti umili ken dagitoy ket mapagtalkan.
Mainaig iti daytoy, kunana a dakkel a pagyamananna ken ti intero a probinsia kadagiti amin a kameng ti pulisia ditoy probinsia iti panangidaulo ni Pol. Col. Obar ti napintas a pannakatagiben ti linak, urnos ken talna ditoy probinsia.
Inlawlawagna a masapul a masigurado nga amin a kameng ti Ilocos Norte Police Provincial Office ket responsable ken psychologically stable ken nasalun-at para iti pannakaipasigurado ti pannakaitultuloy ti napintas a serbisio kadagiti umili.
Kabayatanna, inpakaammo ni Gob. Manotoc a dagiti napadayawan a police officers ket naipaayan ti plaque pakairamanan ti resolusion manipud ti Sangguniang Panlalawigan a mangipapaay kadagitoy ti pammigbig ken sangapulo ribu a pisos.
