LAOAG CITY – Umabot iti 15 nga ektarya iti kabanbantayan ti nauram iti Brgy. Manalpac iti ili ti Solsona.
Segun ken ni Vice Mayor Jonathan de Lara iti nasao nga ili, narigatan dagiti bumbero iti panangsebseb iti apoy gapu ta saan a dumanon ti hoss iti mismo lugar a maur-uram ken napuskol iti asok.
Gapu iti daytoy, kunana a nagusarda pay ti chopper helicopter nga isu ti nangikargaanda ti danum manipod iti Abucay Dam iti ili ti Piddig.
Inbatadna nga umabot iti 75 a ribu a pisos ti inisyal a balor iti pannakauram ti kabanbantayan.
Inlawlawagna nga alisto ti panagramram ti apoy gapu iti napigsa nga angin a nangitunda ti pannakadadael kadagiti naimula a kayo.
Nupay kasta, kunana nga ikarigatan dagiti Barangay Ranger Officers nga agmula ti seedlings tapno masuktan met laeng dagiti naperdi a mula gapu iti uram.
Innayonna nga awan ti nadangran iti napasamak nga insidente gapu ta awan met dagiti agnanaed iti nasao a kabanbantayan.
Kabayatanna, nagbibinnulig dagiti nagduduma nga ahensia ti gobierno kas ti Bureau of Fire Protection, Philipine National Police, Marines, Provincial Disaster Risk Reduction and Management Office, Municipal Disaster Risk Reduction and Management Office ken ti Philippine Air Force para iti pannakasebseb ti apoy.
Iti agdama, manarimaan pay laeng ti pannakaisayangkat ti imbestigasion dagiti otoridad no ania ti namunganayan ti napasamak nga uram.
