LAOAG CITY – Inpakaammo ni Brgy. Chairman Renier Mark Manuel iti Brgy. Zamboanga ditoy siudad ti Laoag nga adda ti dua a kaso a nakagat ti aso iti barangayda.
Segun kenkuana, saan a dagiti aso ti ayan ti problema no di ket dagiti akin-taraken kadagitoy no apay nga adda dagiti walang aso kadagiti kalsada.
Inbatadna a nasken nga agtungpal dagiti residente nga igalutda dagiti tarakenda nga aso tapno saanda a makaruar ken makadesgrasia kas maibasar iti naiyatnag nga ordinansa.
Inlawlawagna a nupay awan ti kaso ti rabies kadagiti tarakenda nga aso ket saan a mabalin nga agpakampante dagitoy isu a masapol a sumurot kadagiti maipatpatungpal a pagalagadan.
Kunana a saanda pay a kabaelan ti agtiliw kadagiti walang nga aso gapu ta awan pay ti umdas a kagamitan iti panangtiliw kadagiti aso ken saan pay a dimmalan iti naan-anay a panagsanay dagiti barangay officials pakairamanan dagiti barangay tanod-na.
Innayonna nga ikarigatanda a mangaramid ti kagamitan iti panangtiliw kadagiti aso tapno saan a madangran ti aso ken maprotektaran dagiti opisial ti barangay.
