LAOAG CITY – Natay ti agarop 20 a Palestinians, pakairamanan ti sumagmamano nga ubbing ken paramedic iti Israeli strikes iti amianan ken abagatan ti Gaza.
Basar iti report, nagusar ti Israeli military kadagiti tangke ken aircraft iti iraraot da iti lugar kontra kadagiti ibilang da kas terorista a nagpaputok kadagiti tropa da iti amianan ti Gaza Strip a nakana a nakasugatan ti maysa nga opisyal.
Naamoan a napasamak ti panagatake iti asideg ti Yellow Line, a nakaitasyonan ti Israeli forces iti Gaza, ken daytoy ket maibilang kas panaglabsing iti tallo a bolan a ceasefire agreement iti Hamas.
Immunan nga inakusaran ti Hamas ti Israel a mangus-usar ti pammaltog kas narabaw a pambar tapno maikalintegan ti agtultuloy a panagpatay ken agresyon kontra kadagiti tao da.
