LAOAG CITY – Naaprobaran iti maikadua a pannakaibasana ti House Bill 10312 a mangipaay ti kanayonan a diskuento kadagiti senior citizen ken persons with disability malaksid pay iti 20 a porsiento ken Value-Added Tax exemption a maaw-awatda itan.
Segun ken ni ACT-CIS Rep. Erwin Tulfo, malaksid iti nasao a discount ken Value-Added Tax exemption, makaalada pay ti aniaman a discount wenno promotional offer ti establishimento.
Inbatadna a saan met a malugi dagiti establishimento maipapan iti daytoy gapu ta mabalinda met nga usaren ti discount kas deductible iti buis a bayadanda.
Ipayal-aliston ni House Speaker Martin Romualdez ti pannakaipasa ti nasao a gakat.
Kabayatanna, mangnamnama ni Cong. Tulfo a makalusot ti House Bill No. 10312 iti Kongreso sakbay nga agngudo ti tawen ken mabenepisiaran dagiti Senior Citizens ken Persons With Disability iti daytoy.
