LAOAG CITY – Inaprobaran ti Sangguniang Panlungsod ti 30 a tricycle franchise ditoy siudad ti Laoag.
Kagiddan iti pannakaaprobar iti daytoy, naminsan manen a pinalagipan ni Vice Mayor Rey Carlos Fariñas dagiti tricycle drivers a naaprobaran ti tricycle franchise-na.
Kunana a dagitoy a prangkisa ket inpaay ti gobierno a libre isut gapuna nga usaren iti nasayaat ken saan a mangabuso iti plete.
Inbatadna a mariknana ti mapaspasaran dagiti tricycle drivers iti agdama a krisis wenno iti panagngato ti presio dagiti produkto a petrolyo gapu ta uray ti kompaniada iti bus ket nagkissayda ti biahe.
Inlawlawagna nga ikarkarigatanda a tulungan dagiti tricycle drivers ken nasken a makikoordinar dagitoy kadakuada tapno awan ti agbalin a problema kadagiti ilugluganda a pasahero.
Innayonna a no adda ti panangabuso kadagiti prangkisa dagitoy ket mabalin a maibabawi daytoy kadakuada.
