LAOAG CITY – Inpakaammo dagiti opisyal ti Russia nga umabot iti 400 a temporary shelter ti linukatan da para kadagiti 30 ribo a tattao a naibakwit gapu iti opensiba ti Ukraine iti cross-border iti rehiyon ti Kursk.
Mainaig iti daytoy, inpalgak ti tropa ti Ukraine a kontrolado dan ti 1000 sq km ti Russian territory.
Inlawlawag ni Ukrainian President Volodymyr Zelensky nga isardeng da laeng ipatpatungpal da nga opensiba no umannugot ti Russia a maaddaan ti kapia iti dua a pagilian.
Innayon na nga awan ti plano ti Ukraine a mangokopar ti Kursk region.
Immuna iti daytoy, inakusaran ni Russian President Vladimir Putin ti Ukraine ti panangipatpatungpal na ti krimen kontra kadagiti tattao ti Russia.
Inpetteng na a mangipatungpal da met ti inawagan na kas “worthy response” kontra iti Kyiv.
