LAOAG CITY – Dumanon iti 45 a porsiento kadagiti Pilipino ti nangibaga a saan a nagbaliw ti estado iti panagbiagda iti napalabas a 12 a bulan.
Basar iti Social Weather Station, 30 a porsiento met kadagiti Pilipino ti nangibaga a simmayaat iti panagbiagda idinto a 25 a porsiento ti nangibaga a kimmaro pay ti estado iti panagbiagda iti napalabas a 12 a bulan.
Ti nasao a survey ket addaan ti Net Gainers score a +5 (% Gainers minus % Losers) a naarisit ti Social Weather Station kas high (+1 to +9).
Ti nasao a September 2023 Net Gainer score ket 13 points a nababbaba iti “very high” a +11 idi Hunio 2023. Daytoy met ti kababaan manipud iti -2 a datos idi Hunio 2022.
Agpada laeng ti nasao a March 2024 Net Gainer score iti +5 (30% Gainers, 25% Losers) a datos idi Disiembre 2023.
Maibasar pay iti survey, nangatngato pay ti 7 points iti -2 (fair) a datos idi Setiembre 2023 ngem bumaba met daytoy iti 6 points maidasig iti “+11 very high” a datos idi Hunio 2023.
Ti survey ket naiyuswat idi Marso 21 agingga 25, 2024 babaen iti face-to-face interviews kadagiti 1,500 nga indibidual iti pagilian nga agtawen iti 18 ken agpangato.
