LAOAG CITY – Inpakaammo ni Mr. Erwin Ang, bise president ti Universal Leaf Phil. Inc. a mannarimaan ti panangar-aramid da iti taep kas “bricket” tapno mapagbalin nga alternatibo a pagsungrod kadagiti pugon a paglutoan ti tabako.
Segun kenni Mr. Edwin Cariño, mangidadaulo ti Sustainable Development Center wenno SDC, daytoy ti inpatalged ti nadakamat a kompanya kalpasan ti panangkarit na kadagitoy a mangipaay ti alternatibo a pagluto a saan laeng a kayo gapu ta maysa ti pannakaprotehir ti aglawlaw kadagiti kangrunaan a programa ni Gov. Matthew Marcos Manotoc.
Inlawlawag na a basar iti panagsukisuk ti taep ket addaan ti nangato a BTU wenno “Bio-thermal unit” wenno pudot a parnuayenna.
Mainaig iti daytoy, mangnamnama ni Cariño a maikamakam ti ULPI ti ar-aramiden da iti masungad a panagmumula ti tabako.
Inannugot na nga adu metten dagiti naaramid nga alternatibo a pagluto kas iti “coal bricket” wenno ti “green charcoal”.
Nupay kasta, kunana a rimmuar iti panagadal nga adu ti parnuayen daytoy a “carbon emission” wenno asuk a saan a nasayaat iti aglawlaw.
Mainaig iti daytoy, dakkel ti namnamana a ti ar-aramiden ti ULPI nga alternatibo a pagluto ti tabako ket awan ti ania man a parnuayen na a makapadakes iti aglawlaw.
