LAOAG CITY – Negatibo ti resulta ti paraffin examination dagiti 16 nga indibidwal a residente iti Barangay Surong iti ili ti Pasuquin mainaig pay laeng iti pimmusay kalpasan a napalto-paltogan ti maysa a lalaki.
Daytoy ti kinumpirmaran ni Police Lt. Roi Manuel Ordonio, ti chief of police ti PNP-Pasuquin.
Segun kenni Ordonio, ti resulta ti eksaminasyon dagiti nasao nga inibidwal ket rimwar laeng iti kalman no sadinno ket negatibo daytoy.
Gapo iti daytoy, kuna ni Ordonio a mangiyuswat da ti naun-uneg nga imbestigasyon mainaig iti pannakapapatay ti biktima a ni Roderick Castillo a residente iti nasao a barangay.
Inlawlawag na a no adda kuma ti nagpositibo kadagiti 16 nga indibidwal ket isu ti maysa a tutukan da wenno makatulong iti pannakabigbig ti suspek.
Innayon ni Ordonio nga agpapan ita ket awan pay ti pamalpalatpatan ti PNP no siasinno ti suspek ken no anya t motibo iti pammaltog.
Maipalagip a napalto-paltogan ti biktima ken natagbat pay ti abaga na bayat a nakamotorsiklo iti Barangay Surong iti nadakamat nga ili.
