LAOAG CITY – Inadmitir ni Engr. Manuel Aurelio, Asst. City Engineer ditoy siudad ti Laoag ken mangidadaulo ti Waste Management Team nga adda ti panaglamiis ti lokal a gobyerno ken dagiti barangay maipanggep ti waste segragation.
Immunan ti daytoy, inbatad ti opisyal nga immabot ti agarup 80% ti compliance rate dagiti barangay iti daytoy a banag sakbay ti panagngato ti bilang dagiti nakaptan ti covid-19 virus ditoy siudad idi bulan ti hulyo, ngem bimmaba daytoy a rating iti nababbaba ngem 50% idi ngimmato ti bilang dagiti covid-19 patients.
Nupay kasta, inbatad ti opisyal a rinugyan da manen ti makisarita kadagiti kakapitan ditoy ciudad tapno ngumato ti segragation compliance dagiti barangay.
Inlawlawag ti opisyal a babaen ti panagkikinnammayet dagiti lumugar ket mapapintas ti sistema ti panagbasura ditoy siudad.
Maipalagip nga itay kallabes ket inbatad ni Aurelio a nu masurot ti waste segragation ket mabalin nga umabot ti agarup 7 a tawen ti kabayag ti makutkutkut a first phase ti sanitary landfill nga agarup maysa nga ektarya.
