LAOAG CITY – Natay ti babai a mayor iti maysa nga ili idiay Mexico kalpasan a pinaltu-paltugan dagiti armado a lallaki.
Napasamak daytoy sumagmamano laeng nga oras ti napalabas kalpasan ti panagselebrar ti intero a Mexico iti panangabak ni Claudia Sheinbaum kas kaunaan a babai nga agserbi a presidente iti nadakamat a pagilian.
Ni Yolanda Sánchez a nangrugi a nagserbi iti nadakamat a lugar idi Setyembre 2021 ket tinambang dagiti suspek iti ili ti Cotija.
Basar iti report, namin-19 a daras a pinaltu-paltugan dagiti suspek ti mayor ken karaman pay a pimmusay ti bodyguard na.
Naamoan a sipud nagturay idi Setyembre 2021 ket addan dagiti naaw-awat a pangta iti biag ni Sánchez.
