LAOAG CITY – Inbilin ti Korte Suprema iti Philippine Health Insurance Corporation wenno Philhealth a mangipaay daytoy ti turn around time recorded reimbursement iti uneg ti 10 nga aldaw mainaig iti panagbaybayad na kadagiti claims dagiti ospital ken doktor.
Inaramid daytoy ti kangatoan a korte iti pagilian kalpasan a naituloy idi kalman ti oral arguments manipod iti napagtipon a petisyon nga inpila da Senate Minority Leader Koko Pimentel, dagiti grupo ti 1SAMBAYAN Coalition ken ni Bayan Muna chairman Neri Colmenares.
Ti nasao a petisyon ket naipila kalpasan iti pammilin ti Department of Finance (DOF) iti babaen ti maysa a department circular iti napalabas a tawen a mangiyakar ti P89.9 billion para iti saan a nausar a pondo ti ahensya maikabil iti national treasury.
Sakbay iti daytoy ket nangiparuk-at ti Korte Suprema ti Temporary Restraining Order (TRO) tapno isardeng ti maudi a paset ti panangiyakar ti pondo ti Philippine Health Insurance Corporation idi Oktubre 2024.
Nangrugi ti oral arguments para iti pannakaiyakar ti pondo ti PhilHealth idi Pebrero 4, ken gagem daytoy a maestablisar no dagiti pammilin ti Department of Finance ket legal ken maiyataday iti 2024 General Appropriations Act (ACT) ken iti 1987 Constitutions.
