LAOAG CITY – Umabot iti innem a maladaga ti natay iti napalabas a dua a lawas gapu iti nakaro a kinalamiis ti paniempo iti Gaza ken awan ti umiso a lugar a pakaikabilan dagitoy.
Daytoy ti kinumpirmaran dagiti doktor iti Patient’s Friends Benevolent Society hospital iti ciudad ti Gaza City.
Basar iti nadakamat nga ospital, siyam a kaipasngay a maladaga nga agpaspasar ti cold injuries ti naadmit ngem lima ti pimmusay idinto a maysa ti kritikal ti kondisyon na.
Gapu iti daytoy, nagpanawagan ti Patient’s Friends Benevolent Society hospital para iti dagus a pannakaideliber ti caravans ken fuels tapno mapadur-as ti kondisyon ti agarop 945,000 a displaced Palestinians nga agnanaed kadagiti tents ken makeshift shelters.
Kabayatanna, inakusaran ti Palestinian armed group nga Hamas ti Israel a napaay a nangipalubos ti napagtutulagan da a bilang ti tents, caravans ken dadduma pay a shelter supplies bayat iti ceasefire a nangrugi addan lima a lawas ti napalabas, banag a naglikudan met ti nadakamat a pagilian.
