LAOAG CITY – Maisagsaganan ti maipila a reklamo a panaglabsing iti Republic Act No. 10591 wenno ti Comprehensive Firearms and Ammunition Regulation Act kontra iti Mechanical Engineer nga agtawen ti 43 ken residente iti Barangay 61, Cataban ditoy siudad ti Laoag.
Maipalagip a ti suspek ket naarestar iti naiwayat a Search Operation no sadinno a nakumpiskar dagiti otoridad ti calibre 45 a paltog nga addaan ti pito a bala iti sirok ti kama iti kuarto ti suspek.
Malaksid iti daytoy, naala pay dagiti otoridad ti 42 a bala ti calibre 45 a paltog ken maysa a 9mm a pistol iti uneg met laeng iti kuarto ti suspek, pakairamanan dagiti sumagmamano nga empty shells a nasarakan iti cabinet.
Immunan nga inpetteng ti inhinyero a naimula laeng dagiti nabirokan nga ebidensia kontra kenkuana.
