LAOAG CITY – Inbatad ni Presidente Ferdinand Marcos Jr. nga awan ti maris pulitika ti pannakaarestar ni dati a Presidente Rodrigo Duterte babaen ti inparuk-at nga arrest warrant ti International Criminal Court gapu iti kaso na a crimes against humanity.
Inlawlawag ni Presidente Marcos a tawen 2017 paylaeng idi nangrugi dagiti kaso ti dati a presidente, sakbay a nagikkat ti Pilipinas iti Rome Statute idi 2019 iti babaen metlaeng ti administrasyon ni Duterte.
Kuna na a tinulungan da laeng ti International Police (Interpol) ken saan da a nakisarsarita it International Criminal Court seknan iti pannakaarestar ni dati a Presidente Duterte.
Inpalagip ni Presidente Marcos a ti Interpol ti timmulong iti Pilipinas tapno mabirukan ken maisubli ditoy pagilian dagiti indibidual a napan naglemmeng iti ballasiw taaw nga adda ti linabsing na a linteg iti pagilian a kas kada Alice Guo, Arnie Teves ken dadduma pay.
Immuna iti daytoy, alas-11:03 idi rabii a nagtayab manipod idi Villamor Airbase ti Gulfstream G550 chartered flights a nagluganan ti grupo ni dati a Presidente Duterte nga agturong idiay The Hague, Netherlands.
Gapu iti kaatiddog ti biyahe ket ag-stop over paylaeng ti nasao nga eroplano iti Dubai, United Arab Emirates para iti refueling kalpasan na ket naan-anayen nga agderetso iti The Netherlands.
Inbatad ni Atty. Martin Delgra III, ti legal counsel ti dati a presidente a kadwa ni Duterte da dati nga Executive Secretary Salvador Medialdea ken nurse a personal assistant na.
