LAOAG CITY – Awan ti problema iti panaglako ti tabako iti ili ti San Nicolas.
Segun iti lokal a gobierno, nasayaat ti pannakairekord dagiti lugar a pakailaklakuan ken ti lugar a mamulmulaan.
Patien ti lokal a gobierno a napinpintas to manen ti bingay iti kada ili gapu ta ibasar ti Department of Agriculture iti aerial picture wennu kalawa ti mamulaan iti tunggal Local Government Unit.
Kabayatanna, agtultuloy ti suporta ti lokal a gobierno kadagiti mannalon, pakairamanan dagiti agmulmula ti tabako babaen ti pannakaipaay kadagiti farm inputs ken machieneries.
Malaksid iti daytoy ket adda pay dagiti napapintas a pugon a naaramid para kadakuada.
Mainaig iti daytoy, naamoan nga iti napalabas a tallo a tawen ket ngimmato ti bingay iti ili ti San Nicolas ti RA 7171 gapu kadagiti maipapaay a tulong kadagiti mannalon.
