LAOAG CITY – Natay ti nakamotorsiklo a lalaki kalpasan a nadisgrasya iti national highway a paset ti Brgy. 30, Corocor iti ili ti Bacarra.
Binigbig ni Police Lt. William Sahagun, Officer-in charge iti ili ti Bacarra, ti biktima a ni Manuel Peñaflor y Fabros, agtawen ti 65, naasawaan ken residente iti Brgy. 5 ditoy ciudad ti Laoag.
Inbatad na a basar iti imbestigasyon da, bayat nga agpapa-amyanan ti biktima ket napukawan ti kontrol a nangitunda iti pannakaidungpar na iti alad iti maysa a balay.
Gapu iti napasamak ket nagsagana ti nakana a sugat ti biktima kangrunaan na iti ulo gapu iti pannakaitupar na iti semento.
Dagus a nagresponde dagiti kameng ti Philippine National Police, Bureau of Fire Protection ken Municipal Health Office iti ili ti Bacarra iti nakapasamakan ti insidente, ngem iti pannakaitaray ti biktima iti ospital ket naideklarar a dead on arrival babaen ken ni Dr. Ian Francis Sotto, ti Municipal Health Officer ti nasao nga ili.
Mainaig iti daytoy, kuna ni Police Lt. William Sahagun, possible a naatake iti puso ti biktima bayat nga agmanmaneho nga isu metten ti nangitunda iti pannakadisgrasya na.
