LAOAG CITY – Napilaanen ti kaso gapu iti panaglabsing iti Comelec Resolution No. 11104 wenno ti vote buying ti kandidato a nagpaidasig iti kina-Konsehal ken 13 nga indibidual iti Barangay 9 San Pedro iti ili ti Paoay.
Segun ken ni P/Maj. Mark Jeffrey Juan, Legal Officer ti Ilocos Norte Police Provincial Office, kalpasan ti inquest proceeding ket dimmalan iti preliminary investigation dagiti maseknan.
Inbatadna a nagpiyansa met laeng dagiti nasao nga indibidual para iti temporario a pannakawaya-wayada.
Inlawlawagna a mangipaneknek a patas ti panangipakatda kadagiti maipatpatungpal a pagannurotan.
Innayonna a ti nasao a naipila a kaso ket naipaiman iti Provincial Prosecutor’s Office.
Maipalagip nga adda ti maysa a kameng ti pulisia ti nakipila iti maysa a pagtaengan iti nasao a barangay ken nakaawat ti sobre ti pulis a naglaon ti maysa a ribu a pisos ken sample ballot babaen ti maseknan a kandidato.
