LAOAG CITY – Pormalen nga insubmitir iti Impeachment Court ti kampo ni Vice President Sara Duterte ti listaan dagiti abugadona.
Basar iti Impeachment Court, alas-5:30 ti malem idi naawatda ti dokumento wenno “Appearance Ad Cautelam” manipud iti Fortun Narvasa & Salazar Law Office a mangibagi ken agbalin a mangikalintegan ti Bise Presidente iti impeachment trial.
Nailanad a pinatulodan ti kopia dagiti abugado ni Duterte ti House of Representatives ngem addaan daytoy ti note a “Tender Copy refuse to receive.”
Karaman kadagiti agbalin nga abugado ni Duterte da Philip Sigfrid Fortun, Gregorio Narvasa II, Shiela C. Sison, Carlo Joaquin Narvasa, Roberto Batungbacal, Justin Nicol Gular, Lindon Miguel Bacquel, David Ronell Golla VII, Maria Selena Golda Fortun, Clarlaine Radoc, Francesca Marie Flores, Miguel Carlos Fernandez, Micheal Wesley Poa, Reynold Munsayac, Mark Vinluan ken Ralph Bodota.
Kabayatanna, matuloy latta ti impeachment trial ni Vice President Sara uray pay nagkedked daytoy a simmungbat iti Articles of Impeachment.
Inbatad ni Senate President Francis “Chiz” Escudero, maipalubos ti depensa a makastrek ti “not guilty” plea para ken ni Duterte.
Maipalagip a nangipatulod ti summons ti Impeachment Court ken ni Duterte ken adda laeng agingga inton Hunio 21 tapno agsungbat daytoy.
Kuna ni Escudero nga awan pay ti naawatda a sungbat manipud iti Bise Presidente pakairamanan ti House of Representatives nga agkidkiddaw ti sertipikasion ti impeacment court a saan a maikanniwas iti Konstitusion ti inpatulodda nga Articles of Impeachment.
