LAOAG CITY – Umad-adu dagiti agtagikua kadagiti lote a naapektaran iti pannakaipalawa ti Laoag International Airport nga agkalikagum a mangisubmitir kadagiti kasapulan a dokumento tapno mabayadanen dagiti lote dagitoy.
Segun ken ni Mrs. Evalaudia Duyor, Officer In-charge ti Provincial Assessor’s Office, iti agdama ket addan ti tallo a nakaawaten ti full payment.
Inbatadna a malaksid iti daytoy ket adda pay ti 10 a dadduma pay ti nakaawat ti 50 a porsiento iti bayad dagiti lote dagitoy a naapektaran iti pannakaipalawa ti eropuerto.
Inlawlawagna a karaman ditoy dagiti uppat a nakaawat iti kallabes iti 50 a porsiento a bayad ti lote.
Kunana a manamnama nga adu pay dagiti umawat ti bayad ti lote apaman a malpasda ti pannakaiproseso dagiti kasapulan a dokumento.
Immuna iti daytoy, naammoan a 50 a porsiento ti bayad dagiti lote ti immun-una a naipaima kadagiti agtagikua kadagitoy idinto a ti kaguduana ket maiyawat apaman a maiyakar ti titulo iti babaen ti nagan ti Department of Transportation.
