LAOAG CITY – Iti panaglukat ti 20th Congress ket inlungalong ni TGP Party-list Rep. Bong Teves nga imbestigaran ti Kamara ti saan pay a nabayadan nga utang ti PhilHealth kadagiti sumagmamano a pribado nga ospital.
Inbatad ni Teves, gagem ti imbestigasion a maduktalan ti rason no apay nga adda ti nabatbati pay laeng nga utang kadagiti private hospitals iti baet nga adda ti nailatang a pundo iti national budget para iti daytoy.
Naammoan a ti addang ni Teves ket kas sungbat ti rakurak ti Private Hospitals Association of the Philippines Inc. a saanda pay laeng nga agawat ti guarantee letters.
Daytoy ket kalpasan a dumanonen iti 530 a milyon a pisos a maipagarup nga utang iti babaen ti Medical Assistance for Indigent and Financially Incapacitated Patients (MAIFIP).
