LAOAG CITY – Nabirukan a maysan a nalamiis a bangkay ti maysa a lalaki a sumagmamano nga aldawen a mapukpukaw iti Barangay 16 San Marcos iti ili ti San Nicolas.
Segun ken ni P/Capt. Sygman Benigno, Hepe ti San Nicolas Municipal Police Station, nabigbig ti biktima a ni Leonardo Tabora, agtawen ti 43 ken residente ti Barangay Balatong iti siudad ti Laoag.
Inbatadna a basar iti inwayatda nga imbestigasion, adda ti nabangsit nga angot ti nadlaw ti dua a residente iti asideg iti pagar-aramidan ti uring ti biktima.
Gapu iti daytoy, kunana a napan ti kaanakan ti biktima iti paggapgapoan ti nabangsit nga angot no sadinno a nakitana ti ima ti maysa a tao manipud iti daga.
Inlawlawagna a sakbay ti insidente ket nagiinum ti biktima ken innem pay nga indibidual.
Innayonna a mamati daytoy nga adda ti foul play a napamasak iti insidente isu a naiget ti panangiwayatda ti naun-uneg nga imbestigasion.
Mainaig iti daytoy, kuna ni Mr. Dennis Coloma, maysa kadagiti nakainuman ti biktima a masdaaw daytoy iti napasamak iti biktima gapu ta awan met ti ammona a karirina a mabalin a mangaramid iti daytoy kenkuana.
Kabayatanna, insigida nga inpakaammo ni Ms. Cherry Dela Cruz, maysa kadagiti residente nga immuna a nakakita iti biktima a nagaburan ti daga pakairamanan dagiti ikamen, lupot ken dadduma pay a kagamitan ti biktima iti asideg ti bassit a kubo-kubo daytoy kadagiti opisial ti barangay.
