LAOAG CITY – Inpilan ni Senate President Francis “Chiz” Escudero ti maysa a gakat a mangipawil kadagiti kabagyan ti opisyal ti gobierno nga agbalin a supplier wenno contractor dagiti proyekto ti gobierno.
Agtalek ni Escudero a ti Senate Bill No. 783 nga inpila na ket ad-adda pay a mangpatibker iti pannakasalaknib ti pagilian kontra iti korapsyon.
Masakupan ti gakat dagiti transaksyon nga adda ti pakainaigan iti suplay, imprastruktura, joint ventures, ken public-private partnerships, malaksid laeng kadagiti kontrata a maibilang nga highly technical, proprietary, wenno confidential.
Inlawlawag pay ni Escudero iti gakat ti sakupen ti sarita nga “opisyal ti gobyerno,” a pakairamanan dagiti addaan ti responsibilidad a mangbukel ti pagannurutan, mangiwanwan wenno mangidaulo iti man career wenno non-career service, karaman dagiti adda iti military ken uniformed personnel.
