LAOAG CITY – Natiliw ti maysa a mannalon kalpasan a nagikot ti paltog iti bar iti Discolandia iti Barangay 1 ditoy siudad ti Laoag.
Segun ken ni P/Capt. Rudy James, Deputy Chief of Police ti Laoag City Police Station, kabayatan a mangiwaywayat dagiti otoridad ti Oplan Bakal Sita ket ditoy a nakumpiskarda ti maysa a calibre .45 a pistol nga addaan ti maysa a magazine nga adda ti kargana nga innem a bala a kukua ni Domingo Ortesa Ramos, agtawen ti 39, awanan asawa, mannalon, tubo iti 44 Doña Josefa St., Guevara Subdivision, Brgy. 18, Cabangan, Legazpi City, Albay ngem agdama nga agnanaed iti Barangay 15, Valdez iti ili ti Banna.
Basar iti imbestigasion, boluntario a linukatan ti suspek ti body bag daytoy ket ditoy a nakita ni PSSg Diosdado Mandac iti uneg ti sling bag-na ti nasao a paltog.
Gapu iti daytoy, biniruk ti pulis iti suspek ti License to Own Firearm, Permit to Carry Firearm ken Firearm Registration ti ikotna a paltog ngem awan ti naipakitana rason nga insigida a kinumpiskar ti pulis ti paltog ti suspek ken naarestar daytoy.
Mainaig iti daytoy, dinayaw ni Mr. Prince Xian Aquino, Presidente iti Discolandia ditoy siudad ti Laoag ti naiget a pannakaipatungpal dagiti otoridad ti Oplan Bakal Sita tapno maipasigurado met laeng ti kinatalged dagiti customer kabayatan ti kaadda dagitoy iti lugar.
Kabayatanna, inpakaammo ni Mr. Chris Jansen Mandac, Bise Presidente iti Discolandia ditoy siudad a sumurot kadagiti pagalagadan tapno maliklikan ti pakaisagmakan dagitoy nangruna ket naiget ti maipatpatungpal a seguridad iti lugar.
