LAOAG CITY – Desidido ti Local Government Unit ditoy siudad ti Laoag iti pannakaipatungpal ti underground wiring system ditoy siudad.
Inbatad ni Engr. Marishel Batuac, City Engineer ditoy siudad ti Laoag, manarimaanen ti pannakikoordinar ni Mayor James Bryan Alcid kadagiti manamnama nga agbalin a contractor iti nasao a proyekto.
Inlawlawagna a ti underground wiring ket maysa a wagas a panangikabil iti baba ti kalsada dagiti waya tapno maliklikan ti spaghetti wires.
Kunana a ti kangrunaan a waya a mairaman ket dagiti laeng waya dagiti telecommunication companies.
Inpettengna a ti pannakaipatungpal daytoy ket saanda a kasapulan ti major construction activity wenno pannakadadael iti paset ti kalsada gapu ta adda ti equipment nga usarenda a mangkulokol a pagnaan ti tubo a pakaikabilan dagiti waya.
Naammoan a ti kangrunaan a pakaipatungpalan daytoy ket dagiti kangrunaan a kalsada ditoy siudad ti Laoag kas iti Rizal Street, Bonifacio Street, Bacarra road ken dadduma pay.
Iti agdama, inpakaammona a manarimaan pay laeng ti pannakisaritada iti Mayor sakbay a makisarita kadagiti kontraktor para iti naan-anay a detalye ti nasao a banag.
Innayonna a mangnamnama a mangrugi ti pannakaipatungpal daytoy ita a tawen tapno masolbar ti parikot maipanggep kadagiti spaghetti wires.
