LAOAG CITY – Natay ti 17 nga indibidual gapu iti Bagyo Ragasa idiay Taiwan.
Daytoy ket kalpasan a nag-landfall ti bagyo idiay China no sadinno nga adda ti agarup dua a milyon nga indibidual ti nagibakwit.
Mainaig iti daytoy, ti nasao a bilang dagiti pimmusay ket kalpasan a naglippias ti maysa a karayan idiay Taiwan a nangitunda ti nakaro a panaglayos no sadinno nga inladawan dagiti geologists daytoy kas tsunami manipud iti kabanbantayan.
Kimmapsot metten ti Bagyo Ragasa manipud iti super ket nagbalin laengen daytoy a severe typhoon status ngem nagtalinaed a makadadael gapu iti kinapigsa ti angin a dumanon iti 241 a kilometro iti kada oras.
Naammoan a ti katukad ti Category 5 hurricane, maibilang ti Bagyo Ragasa kas kapigsaan a bagyo iti intero a lubong a dimmuprak iti South China Sea iti sumagmamano nga aldaw.
Kabayatanna, saan a nag-landfall ti nasao a bagyo idiay Hong Kong ngem nangitunda ti pannakadangran ti 62 nga indibidual gapu iti napigsa nga angin ken tudo.
