LAOAG CITY – Inladawan ti Gaza City medics nga adu dagiti matmatay iti ospital gapu iti agtultuloy a panangatake ti Israel.
Basar kadagiti doktor, mangisaysayangkatda ti nagduduma a medical operations iti narugit a kagamitan a no dadduma ket awan pay dagiti mausar nga anesthetics.
Segun iti maysa nga Australian medic volunteer iti al-Shifa hospital, inaldaw a ngumatngato ti bilang dagiti matmatay ken inladawanna pay no kasano nga isalbarda ti maysa a maladaga manipud iti bagi ti masikog a napapatay iti rinnupak.
Adda laengen iti 500 a metro wenno 1,640 a kadapan ti kaadayo ti Israeli forces manipud kadagiti ospital para iti nalawlawa nga opensiba dagitoy tapno naan-anay a masakup ti Gaza City.
Basar iti Israeli military, ad-adda pay ti panangpaigetda iti panangraut idiay Gaza City tapno abaken ti Hamas ken mawaya-wayaan dagiti hostages dagitoy kalpasan ti sumurok dua a tawen a gubat.
In-inoten a madadael ti Al-Shifa hospital a naminsan a naawagan kas kadakkelan a medical complex iti Gaza Strip gapu kadagiti maiwaywayat nga airstrikes, panagpabettak ken panangpaltog iti ospital.
Gapu iti daytoy, bumasbassiten ti suplay dagiti agas ken agkurkurang dagiti mangasikaso kadagiti bed hospitals dagiti pasiente.
Mainaig iti daytoy, inpakaammo ni Dr. Nada Abu Alrub, emergency specialist manipud idiay Australia a nag-volunteer iti ospital, mangiwaywayatda ti medical operations kadagiti nakana a sugat dagiti pasiente nga awan ti mausar nga anaesthesia wenno painkillers man laeng.
Inlawlawagna nga iti napalabas a lawas, napilitan dagiti doktor a nangiwayat ti emergency Caesarean iti masikog kalpasan a rimmuaren ti ulo ti maladaga banag a natalged ken balligi ti operasion.
Kabayatanna, kuna met ni Dr. Saya Aziz, Australian anaesthetist, inladawanna ti agtawen ti innem nga ubing a lalaki a natukkol ti abaga ken luppona a naguray ti tallo nga aldaw para iti pannakaipadalanna ti operasion gapu ta ti ipangpangruna dagiti orthopaedic surgeon ti ospital ket dagiti maibilang a seryoso a kaso.
