LAOAG CITY – Mapapati a napupuk ti 38 nga indibidual iti pannakanarpuog ti pagadalan idiay East Java, Indonesia.
Gapu iti daytoy, naiget a mangiwaywayat ti rescue operation dagiti otoridad para kadagiti survivors ti insidente nangruna ket adda ti mangmangngegda nga agsangsangit ken agpukpukkaw manipud iti narpuog nga school building.
Naguummong iti pasdek ti ginasgasut nga estudiante a kaaduan kadagitoy ket dagiti agtutubo a lallaki tapno agkararag kabayatan a nagpatpatnag a nagur-uray dagiti nagannak ken kabagian dagiti agad-adal iti pagadalan.
Basar iti Sidoarjo town’s regent, saan a nakaala ti permit ti school management para iti expansion ti building.
Inbatad ti rescue official a ni Emi Freezer nga adda ti 11 a tattao ti naisalakan manipud kadagiti debris sipod nangrugi ti rescue operation idi Lunes ngem adda ti dua a pimmusay iti ospital.
Inlawlawagna nga adda ti maysa a biktima a napupuk rason a nangaramid dagiti rescuers ti tunnel iti sirok ti building tapno maisalakan daytoy.
Mainaig iti daytoy, inpakaammo ni Mudji Irmawan, civil engineering expert manipud iti Sepuluh Nopember Institute of Technology, masapul ti naiget a panagan-annad dagiti rescuers iti pannakaikkat kadagiti banag a naigabor tapno saan a mangitunda ti ad-adda a pannakanarpuogna.
Kuna met ni Mohammad Syafii, head ti search and rescue agency Basarnas, agtitinnulong dagiti rescuers tapno maikkat ti konkreto nga slabs tapno adda ti pagnaanda ngem posible a mangpeggad iti biag dagiti survivors a nagtalined a nakapupuk.
Maipalagip nga adda ti tallo nga estudiante ti natay ken 99 a dadduma pay ti naitaray iti ospital, sumagmamano kadagitoy ket nagsagaba ti nakana a sugat kalpasan a narpuog ti two-storey Al-Khoziny Islamic Boarding School idiay Sidoarjo.
