LAOAG CITY – Inaganan ni French President Emmanuel Macron ti sumaruno nga agserbi kas Prime Minister iti pagilian da iti uneg ti 48 nga oras.
Inrakurak daytoy ti Elysee Palace tapno agsardengen ti ispekulasyon a possible nga adda ti maisayangkat nga eleksyon.
Immuna iti daytoy, inbatad ni outgoing Prime Minister Sébastien Lecornu a ti posibilidad a pannakapukaw ti parliamento ket in-inot nga agmawmaw kalpasan ti panagsasarita dagiti nagduduma a partido iti napalabas a dua nga aldaw.
Maipalagip nga idi Lunes, Oktubre 6, ni Lecornu a nasinged a kaalyado ni Macron ti maikatlo a French Prime Minister a nangpanaw ti trabaho na iti nakurang a maysa a tawen.
Naamoan a kinasarita ni Macron nga agtalinaed paylaeng ni Lecornu iti dua nga aldaw tapno mangbukel ti consensus dagiti partido no kasanu a makaruk-at manipod iti agdama a political crisis.
