LAOAG CITY – Nangiyuswat ni President Ferdinand “Bongbong” Marcos Jr. ti bilateral meetings kadwa na dagiti prime ministers ti Canada ken Thailand iti sidelines ti 47th ASEAN Summit ken mainaig a Summits idiay Malaysia.
Ti nasao a taripnong ket naiyuswat it Kuala Lumpur Convention Centre.
Iti ladawan nga in-share ti Presidential Communications Office (PCO) kadagiti miembroti media, makita ni Presidente Marcos a nakialamano ken ni Canadian Prime Minister Mark Carney.
Nakataripnong pay ti presidente ni Thailand Prime Minister Anutin Charnvirakul.
Immuna iti daytoy, nagkikita dagiti world leaders iti plenary session ti 47th ASEAN Summit, no sadinno nga opisyal a narekognisar ti Timor-Leste kas maika-11 a miembro ti Southeast Asian bloc.
Simmangpet ni Presidente Marcos idiay Kuala Lumpur kadwa na ni 1st lady Liza Araneta-Marcos idi kalman tapno agatendar ti 47th ASEAN Summit and Related Summits a nangrugi ita nga aldaw, Oktubre 26 agingga intono Oktubre 28.
Itay laeng bigat ket sinarabo met ni Malaysian Prime Minister Anwar Ibrahim da Presidente Marcos ken 1st lady Liza Araneta-Marcos iti Kuala Lumpur Convention Centre.
