LAOAG CITY – Mangnamnama ni Senador Loren Legarda a ti pannakaideklarar ti maysa a tawen nga State of National Calamity ket mangpaalisto ti panagbangon ken panagsubli iti normal a panagbiag dagiti biktima ti kalamidad.
Inpetteng ni Legarda nga adda iti bileg ti ehekutibo ti panangideklarar ti State of Calamity ken nakaipalaon daytoy iti Philippine Disaster Risk Reduction and Management Act no sadinno nga isuna ti co-sponsor.
Inpaganetgetna nga agbalin a wagas ti 1-year State of National Calamity para iti panangipaay ti proteksion iti biag iti panawen ti kalamidad, napaspas a panangipadanon ti tulong, pannakatarimaan kadagiti nadadael nga imprastraktura ken rehabilitasion kadagiti naapektaran a komunidad.
Kunana a sumagmamano a dekadan nga ibagbagana a saan nga agbalin a disaster ti natural hazard no kissayan ken solbaren ti kinakapsot ken kinaawan ti kinasagana tunggal mapasaran ti kalamidad.
Dinakamat ti agpanpanday linteg a consistent ti Pilipinas nga umun-una iti World Risk Index ngem kunana a nasken a saan daytoy nga agbalin a normal para kadagiti Pilipino.
Inlawlawag ni Legarda a nasken nga agsubli ti ecosystem ken mapapigsa ti local resilience tapno saan a kanayon nga agresresulta iti pannakatay ken pannakaperdi kadagiti pagbiagan no adda ti dumuprak a bagyo ditoy pagilian.
Innayon ni Legarda a dagiti rumbeng nga aramiden ket kas ti naan-anay a pannakaipatungpal ti environmental ken climate resillience laws, panag-invest iti nature-based solutions kas ti pag-restore ken panangprotekta kadagiti kabanbantayan, mangroves, wetlands, watersheds ken panangpatalinaed a nadalus dagiti karayan.
