LAOAG CITY – Inpakaammo ni Jail warden Edietor Guiang iti Ilocos Norte Provincil Jail a naitiponen iti brigade wenno selda ti pulis a suspek iti pannakapapatay dagiti aglive-in partner iti Barangay 21 iti ili ti San Nicolas.
Inbatad ni Guiang nga immunan a kiniddaw ti nadakamat a pulis nga agtalinaed koma paylaeng iti quarantine facility ngem saanna a pinatgan.
Inlawlawag na a dagiti agtalinaed laeng iti nasao a pasilidad ket dagiti kaiserserrek iti nasao a pagbaludan.
Innayon ni Guiang nga idi damo ket adda ti panagamak ti pulis a maitipon kadagiti dadduma a balud ngem inlawlawag na kenkuana a patas amin ti pannakatrato dagiti adda iti pagbaludan.
Mainaig iti daytoy, kuna ni Guiang a no aldaw ti panagbisita iti Ilocos Norte Provincil Jail ket adda met ti mapan mangbisbisita iti nasao a pulis, kangrunaan na ti asawa ken ti anakna.
Maipalagip a napilaan ti nasao a pulis ti kaso a double murder ken frustrated murder gapu iti pannakapapatay dagiti aglive-in partner a da Barangay Kagawad Joshua Madamba, agtawen ti 27 ken ti live-in partner-na a ni Eloisa Jane Pagadoan Bonilla, agtawen ti 30, idinto a nasugatan met ti maysa pay a kadwa da.
