LAOAG CITY – Inbutaktak ni Caloocan 2nd District Rep. Edgar Erice a posible a mapilaan ti impeachment complaint ni Presidente Ferdinand Marcos Jr.
Inbatad ni Erice nga adda dagiti impormasion a nakalapna nga adda dagiti sumagmamano a Kongresista ti mangipila ti impeachment complaint iti Presidente inton Pebrero iti panagsubli ti sesyon ti Kamara de Representantes.
Inlawlawagna a saan laeng a ni Vice President Sara Duterte ti posible a mapilaan ti impeachment complaint nangruna ket inton Pebrero 6 ket ag-expire ti one year bar rule.
Kunana a dua ti mapadpadaanan inton sumaruno a bulan nga arig agbalin nga “exciting.”
Nagkedked met ni Erice nga inaganan no asino dagitoy a Kongresista a mangipila ti impeachment complaint kontra ken ni Presidente Marcos.
Saan met a maibaga ni Erice a makaala ti umdas a bilang manipud iti Kongreso iti impeachment complaint kontra iti Presidente.
Innayonna a saanna nga iendorso ti aniaman nga impeachment complaint.
