LAOAG CITY – Inparuk-at ni Batangas First District Rep. Leandro Leviste iti panagdengngeg ti Senate Blue Ribbon Committee ti sumurok P720 billion a gatad ti allocables ken ti inawaganna a major tags iti 2025 national budget.
Daytoy ket basar iti naalana a Cabral files ti pimmusay a ni dati a Department of Public Works and Highways (DPWH) Usec. Maria Catalina Cabral.
Inbatad ni Leviste a P721.8 billion ti pakabuklan a gatad ti inawaganna a major tags a kasla codes.
Sumagmamano kadagiti codes dagiti tags ket dagiti sumaganad:
ALLOCABLES a P401.3 billion, BINI 10 a P6 billion, CENTI 2025 a P100 billion, F1 a P10 billion, NON ALLOCABLE a P61.5 billion, BIP ON TOP a P33.4 billion, SENATORS a P20.5 billion, SMB/OTHERS a P25.6 billion ken dadduma pay.
Inlawlawag ni Leviste iti panagdengngeg a kalikagumna a talantanen dagitoy a tags tapno mailawlawag ti Department of Public Works and Highways ngem awan ti nagsaludsod maipanggep iti daytoy.
Inpettengna a saanna a pwinersa nga innala ti Cabral files ken malaksid kenkuana ket addaan met daytoy ni Senador Ping Lacson ken maysa a news agency.
