LAOAG CITY – Inlungalong ni Bacolod City Representative Albee Benitez ti gakat a mangipaay ti ₱4,000 a binulan nga stipend kadagiti pamilia nga addaan ti miembro nga addaan ti autism kagiddan iti panangselebrar ti Autism Consciousness Week.
Nakaipalaon daytoy iti House Bill No. 3379 a mangibilbilin iti Department of Social Welfare and Development (DSWD) a mangestablisar ti Autism Support Allowance Program para iti regular a tulong pinansial kadagiti Persons With Autism (PWA).
Karaman iti gakat ti libre a developmental assessment para kadagiti ubbing nga agtawen ti agingga iti lima, libre nga occupational, speech ken behavioral therapy kadagiti ospital ti Department of Health (DOH), libre nga agas para kadagiti benepisiario nga addaan ti Level 3 Autism.
Inbatad ni Benitez a napateg ti nasao a suporta gapu ta adu a pamilia ti saanna a kabaelan a supusupan ti initial consultations nga agbalor ti ₱4,000 agingga iti ₱5,000 iti kada session.
Malaksid iti daytoy, ti gastos iti therapy ken dadduma pay nga interventions nga umab-abot iti ₱1,000 iti kada session a kasapulan nga aramiden ti uppat agingga iti lima a daras iti kada lawas.
Naammoan a mapattapatta a 1.2 milyon a Pilipino pakairamanan ti 350 a ribu nga ubbing ti agdama nga addaan ti autism ditoy pagilian.
