LAOAG CITY – Inbatad ti Malakanyang a bimmaba ti hunger incidence ken poverty self-rating dagiti Pilipino iti tulong ti social protection programs ti administrasyon, partikular ti Walang Gutom Program nga idaulwan ti Department of Social Welfare and Development (DSWD).
Segun ken ni Presidential Communications Office (PCO) Undersecretary ken Palace Press Officer Claire Castro, welcome iti gobyerno ti kaudian a Social Weather Stations (SWS) survey a mangipakpakita ti panagbaba ti involuntary hunger iti intero a pagilian.
Immunan nga inbilin ni Presidente Ferdinand R. Marcos Jr. nga iprayoridad ti pagsayaatan ti kangrunaan a vulnerable sectors.
Iti Fourth Quarter 2025 survey a naisayangkat idi Nov. 24 agingga iti 30 nga addaan ti 1,200 adult respondents, naduktalan nga adda ti 20.1% ti nangibaga a nagpasar da ti involuntary hunger, nababbaba daytoyo iti 1.9 a puntos manipod iti 22% idi Setyembre 2025.
Inpanakkel ni Castro a ti resulta ket mangipakita ti dumurdur-as nga epekto ti government interventions a gagem na a solusyunan ti food insecurity.
Kabayatanna, inbatad ni Castro a binilin ni Presidente Marcos ti Department of Social Welfare and Development nga ad-adda pay a papigsaen ti Walang Gutom Program, nga addaan ti plano a palawaen ti masakupan na iti 300,000 beneficiaries ita a 2026 kas paset ti commitment ti administrasyon a parmeken ti panagbisin.
Malaksid iti hunger incidence, kuna pay ni Castro a ti poverty ken food poverty self-ratings ket bimmaba met maibasar iti kaudian a survey ti OCTA Research.
