LAOAG CITY – Inpaganetget ni House Committee on Public Accounts chairman Rep. Terry Ridon a mabalin nga ipila manen ti impeachment complaint kontra ken ni Vice President Sara Duterte nga awan ti mabalbaliwan.
Inlawlawag ni Ridon, aspekto teknikal laeng ti nangibasaran ti desision ti Korte Suprema a patibkeren ti immuna daytoy a panangideklarar nga uncostitutional ti articles of impeachment kontra iti Bise Presidente.
Inpettengna a saan nga inkonsiderar iti desision ti Korte Suprema ti linaon, dagiti ebidensia wenno ti form and substance ti impeachment complaint kontra iti maikadua a kangatoan nga opisial ti pagilian.
Kabayatanna, inbatad met ni House Committee on Good Government and Public Accountability Chairman Rep. Joel Chua, ti Supreme Court ruling ket nakatutok laeng iti teknikalidad ken saan nga iti merito ti reklamo.
Kumpiansa ni Chua a maminsan manen a makaala ti suporta manipud iti mayorya dagiti kongresista ti ipila a baro nga impeachment complaint ken ni Vice President Duterte.
