LAOAG CITY – Maproblemaan dagiti sumagmamano a nagannak iti Caribquib National High School iti ili ti Banna gapu kadagiti naruay a reklamoda iti School Principal a ni Mr. Christopher Calano.
Umuna a reklamo dagiti nagannak iti nasao a pagadalan ket no apay agingga kadagitoy a gundaway ket awan pay ti naipaay a Certificate of Academic Excellence para kadagiti agad-adal nga addaan ti kangatoan a grado kadagiti nagduduma a tukad.
Ti maikadua a reklamo, ti maipagarup nga adda ti quota a bayadan iti tunggal nagannak nga agbalor ti 200 a pisos, 500 a pisos ken agpangato para iti maangay a Foundation Day ti pagadalan inton Pebrero 11 banag a madagsenan unay dagitoy nangruna ket saan nga agpapada ti panagbiagda.
Rumrummuar nga adda dagiti nabayadan metten a 200 a pisos ngem awan pay ti naited kadagiti maseknan nga estudiante.
Basar kadagiti nagannak, saan a nailawlawag a naimbag daytoy kadakuada ken naan-anay a naipatungpal uray saanda met pay nga immannugot para iti nasao a banag no sadinno a no gandatenda nga agsaludsod iti School Principal ket maipagarup a makaunget.
Inadmitir dagiti sumagmamano nga school personnel nga awan pay ti naibunong a ticket gapu ta dagiti nagannak ti mang-claim kadagitoy manipud kadagiti class adviser dagiti estudiante.
Ti maikatlo a reklamo, ti maipagarup a panagpamulta kadagiti nagannak a saan a makapan nga agdalus iti pagadalan no sadinno a no saanda a makabayad kadagitoy ket saan a mapirmaan ti clearance dagiti annakda.
Ti maikapat a reklamo, ti maipagarup nga adu dagiti agad-adal ti nasuspenso uray bassit la a banag ti nalabsing dagitoy.
Mainaig iti daytoy, nagturong mismo ti Bombo Radyo Laoag News Team iti Caribquib National High School iti ili ti Banna tapno alaen ti komento wenno reaksion ti School Principal ngem awan isuna kadayta a gundaway.
Nupay kasta, pinadas pay ti News Team a patawagan ti nasao nga School Principal babaen kadagiti school personnel ket ditoy a nagkedked a mangipaay ti aniaman a reaksion maipanggep kadagiti maiyak-akusar kenkuana a reklamo.
Mamati dagiti school personnel a dagiti agrekreklamo a nagannak ket dagiti saan a nagatendar kadagiti maisaysayangkat a taripnong.
Kabayatanna, inpasingked ni Atty. Donato Balderas, Schools Division Superintendent ti Department of Education – Ilocos Norte a mapatawan ti maiyannatop a pannusa ti School Principal no mapaneknekan nga adda ti nasalungasingna a pagannurotan nangruna iti “No Collection Policy” a naiget nga ipatpatungpal ti ahensia.
Immuna iti daytoy, nagreklamo dagiti sumagmamano a nagannak ti Caribquib National High School iti ili ti Banna babaen ti ipa-Bombo segment ti Bombo Radyo Laoag.
