LAOAG CITY – Kinondenar ti human rights advocates ti maipagarop a delaying tactic ti kampo ni dati a Presidente Rodrigo Duterte tapno maisardeng ti panangusig kenkuana iti International Criminal Court (ICC).
Iti maysa nga statement, inrakurak ti Duterte Panagutin Network a nakabase iti Europa a saanen a baro kadakuada dagiti pulitiko nga us-usaren da ti problema iti salun-at tapno malibasan wenno maliklikan ti trial ken pannakabalud da.
Innayon ti grupo a nagdesisyonen ti International Criminal Court a “fit” ti dati a presidente a sumango iti sa pre-trial proceedings.
Inpetteng ti grupo a panangkwestyunar ti kampo ni Duterte iti nasao a desisyon ket baro a taktika tapno iyatiddog pay ti naitantan a justice process.
Inaramid ti grupo ti rakurak kalpasan a nagpila ti lead counsel ni Duterte a ni Nicholas Kaufman ti dua a baro nga apela iti international tribunal.
Karaman ditoy ti apela iti nagbalin a desisyon ti International Criminal Court Pre-Trial Chamber I a nangideklarar a fit ti dati a presidente a makipaset iti pre-trial proceedings, idinto a ti maikadwa nga apela ti depensa ket mainaig iti desisyon ti pre-trial judges a mangimanmandar iti agtultuloy a pannakabalud ti dati a presidente.
