LAOAG CITY – Inpasigurado ni House Majority Leader Rep. Sandro Marcos a nakasagana ti Kamara de Representantes iti babaen ti panangidaulo ni Speaker Faustino Dy III nga ilungalong ken patibkeren ti 52 a gakat a prioridad ti Legislative-Executive Development Advisory Council (LEDAC).
Mensahe daytoy ni Marcos kalpasan a nanayonan ti uppat ti dati nga 48 a Legislative-Executive Development Advisory Council priority measures.
Karaman iti nainayon dagiti gakat para iti travel tax abolition, pananglaban iti fake news and digital disinformation, panangitantan ti eleksion iti Bangsamoro Autonomous Region in Muslim Mindanao (BARMM) pakairamanan ti Expanded Anti-Online Sexual Abuse wenno Exploitation of Children and Anti-Child Sexual Abuse wenno Exploitation Materials Act of 2026.
Inbatad ni Congressman Marcos nga alisto nga agtignay ti House of Representatives tapno masigurado ti panangipasa kadagiti nadakamat a LEDAC priority bills tapno makatulong iti gagem a reporma ni Presidente Ferdinand ‘Bongbong’ Marcos Jr. para iti pagsayaatan dagiti Pilipino.
Iti agdama, addan ti 12 a Legislative-Executive Development Advisory Council measures ti inaprobaranen ti Kamara de Representantes iti maudi ken maikatlo a pannakaibasana a makatulong iti ad-adda pay a panangpasayaat ti panangimaton iti pagilian ken serbisio iti publiko.
