LAOAG CITY – Inpatuloden ti Office of the Ombudsman ti kopya ti subpoena iti Office of the House Secretary General mainaig iti kidkiddawen nga Statement of Assets, Liabilities and Net Worth wenno SALN ti maysa nga empleado ti Kamara de Representantes ken dagiti amin nga agdama a kongresista.
Kidkiddawen ti Ombudsman ti Statement of Assets, Liabilities and Net Worth ni House Deputy Secretary General Sofonias Ponce Gabonada Jr. ken inikkan isuda ti tallo nga aldaw tapno isubmitir daytoy.
Kunada a napateg ti dokumento tapno maammoan no adda ti saan nga indeklarar iti baknang ken no adda ti anomalya iti pinansial a mabalin a mangipasimudaag ti biddot nga aramid.
Kinumpirmaran ni Assistant Ombudsman Mico Clavano a naawaten ti Kamara de Representantes ti kopya kagiddan ti ballaag ni Ombudsman Jesus Crispin Remulla nga isuspenso ni House Secretary General Cheloy Garafil no bilang saan latta a makitinnulong daytoy kadakuada.
Nupay kasta, inpetteng ni Garafil nga iresrespetarda ti opisina ti Ombudsman ken iprosprosesoda dagiti komunikasion nga ipatpatulod iti Kamara de Representantes.
